Biodiversidade, evolución e clasificación dos seres vivos
O termo biodiversidade ten o significado de diversidade biolóxica e abarca toda a variedade da vida. Existen tres tipos de biodiversidade: específica, xenética e ecolóxica.
Tipos de biodiversidade
Biodiversidade específica
É a variedade de especies que existen nunha rexión ou en toda a biosfera. Por exemplo, nun bosque mediterráneo poden encontrarse diferentes especies: a sobreira, o coello, o lince…
Biodiversidade xenética
É a variabilidade que existe na información xenética dos individuos dunha mesma especie.
Biodiversidade ecolóxica
É a variedade de comunidades biolóxicas que interactúan entre si e cos ecosistemas.
A evolución por selección natural
Charles Darwin propuxo unha explicación para a evolución: a selección natural.
Supuxo que un mecanismo similar á selección artificial debía actuar sobre as poboacións naturais. A explicación da evolución por selección natural baséase nestes principios:
- Os individuos que forman unha poboación varían nos trazos que posúen.
- Algunhas das diferenzas ou variacións son hereditarias.
- Nacen máis seres vivos dos que poden sobrevivir.
- A selección natural prodúcese cando uns individuos que posúen certas características sobreviven.
Adaptación
Enténdese por adaptación calquera característica que mellore a capacidade de sobrevivir e de reproducirse dun organismo.
Selección natural e adaptación
As variantes hereditarias xorden por mutación. As que son desfavorables son eliminadas pola selección natural.
Adaptación e aclimatación
Un organismo non pode adaptarse porque non pode cambiar a frecuencia dos seus xenes. A adaptación é unha propiedade das poboacións.
Os cambios que afectan só ao fenotipo e non se transmiten á descendencia denomínanse aclimatación.
Tipos de adaptación
Existen tres tipos de adaptación ao medio:
- Morfolóxica: adaptacións relacionadas coa forma do corpo ou coa estrutura dos órganos internos. Tamén inclúe o mimetismo.
- Fisiolóxica: adaptacións relacionadas co funcionamento dos órganos internos.
- Etolóxica: adaptacións relacionadas con algún tipo de conduta.
Clasificación dos seres vivos
Principios da clasificación
Carl Linneo propuxo un sistema que organizaba as especies en taxons, integrados por especies similares. As especies agrúpanse por criterios de semellanza, elaborando unha xerarquía completa de taxons na que o último nivel constitúe o reino.
Nomenclatura
A nomenclatura linneana asigna nomes aos diferentes taxons e cada especie ten un nome único. O nome científico está composto por dous termos: o primeiro corresponde ao xénero e o segundo á especie. Ambos son palabras en latín ou latinizadas.
Clasificación despois de Darwin
Segundo a teoría darwiniana da evolución, un sistema de clasificación debe basearse en dous criterios:
- A xenealoxía (a ascendencia común).
- O grao de similitude.
Este é o sistema darwiniano, pero existen outros que utilizan só un dos dous criterios:
- O sistema cladístico: baséase na xenealoxía. Os seres vivos deben ter unha orixe común.
- O sistema fenético: baséase na similitude. Os seres vivos agrúpanse segundo o número de características que comparten.
Reinos
Son cinco reinos: monera, protoctista, plantas, fungos e animal.
Os tres dominios
Bacteria, Archaea e Eukarya.